كشف المخرج عبد الوهاب شوقي عن استعداده لتقديم أول أفلامه الروائية الطويلة، والذي يحمل عنوان «يونس في بلاد الشوق»، مشيرًا إلى أنه لا يزال في مرحلة التطوير حاليًا.
فيلم جديد للمخرج عبد الوهاب شوقي
وجاء ذلك خلال مداخلة هاتفية مع برنامج «اليوم هنا القاهرة»، حيث قال: "أنا عندي فيلم طويل أعلن عنه وبيتطور دلوقتي اسمه "يونس في بلاد الشوق"، بس هو هياخد وقت عشان يتطور ويظهر للنور".
تعاون مع خالد كمال وغادة عادل
وعن تعاونه مع الفنانين خالد كمال وغادة عادل في «آخر المعجزات»، قال: "أول مرة أشتغل مساعد مخرج كان مسلسل "العهد" بطولة غادة عادل وخالد كمال، وشافوني وأنا بتطور من مساعد تحت التمرين لمساعد أول ومخرج منفذ. من أول ما قرأت القصة، ما شفتش غير خالد، وإحنا مؤمنين ببعض جدًا، لكن غادة احتاجت شوية إقناع، وكنت محتاج مجهود أكتر عشان تطمن للفيلم وليا.. وحكيت لها القصة اللي بنيتها للشخصية، لأن الأفلام القصيرة زي الكلمات المتقاطعة ومش بتشوف كل حاجة كاملة زي ما متاح في الأفلام الروائية الطويلة والمسرح".
رؤية فنية للأفلام القصيرة
وأضاف: "أنا شايف إننا في زمن الأفلام القصيرة، وده له علاقة بتطور العقل البشري، وبقى فيه منصات في العالم لعرض الأفلام القصيرة فقط، ومنصات للميكرو دراما بس. وبشوف إن الفيلم القصير بيتعامل معاه بشكل غلط، كأنه مشروع صغير أو خطوة نحو الفيلم الطويل، وأنا شايفه فن مستقل جدًا عن الفيلم الطويل".
فيلم آخر المعجزات
يُذكر أن فيلم «آخر المعجزات» حقق نجاحًا لافتًا، حيث فاز بجائزة أفضل فيلم مصري في مهرجان الإسكندرية السينمائي للفيلم القصير، بعد مشاركته في مهرجان عنابة ومهرجان مالمو للسينما العربية.
