هنأ أحمد سليمان، عضو مجلس إدارة نادي الزمالك، الفريق الأول لكرة القدم بمناسبة فوزه على نظيره بيراميدز بهدف نظيف في المباراة التي أقيمت أمس.
تصريحات أحمد سليمان
وقال سليمان، خلال مداخلة هاتفية في برنامج "اللعيب" عبر قناة "إم بي سي مصر": "مبروك الفوز، مبروك لكل الزملكاوية، والكرة المصرية الفترة اللي فاتت دي الزمالك يعني عامل حالة في البلد وفي أفريقيا وفي الدوري، وهو اللي على الساحة الكروية".
وأضاف: "الناس مش شايفه غير الزمالك الفترة دي، مصر كلها مش شايفه غير الزمالك.. عكس ناس تانية بقى بتفكر في أندية تانية".
التحكم في الدوري
وتابع سليمان: "بعد نتيجة امبارح، أصبح المتحكم في الدوري المصري هو نادي الزمالك، وإن شاء الله يكسب الـ 4 ماتشات للي جاية، وكل واحد يعمل اللي هو عايزه، وده اللي هيحصل بإذن الله".
وأكد: "الزمالك اللي عامل الحالة في البلد.. وعامل انتعاش في البلد، الزمالك دلوقتي مفرحين البلد، يعني بقى فيها حدث، وفي جماهير الزمالك، وحاجات زي كده".
دور الجماهير
وأشار إلى أن: "جمهور الزمالك هو صانع الحدث، وعامل حالة حلوة أوي الموسم ده، أنا بشكر كابتن إكرامي إنه قد إيه كان مكشَّر، هو دلوقتي بس اللي فرحان؛ بيقولك علشان الأهلي".
تقييم بيراميدز
وأكد أن: "بيراميدز بإمكانياته كان عامل ليا قلق شخصي كزملكاوي، لأنه نادي كرة فقط، وبيصرف جامد، وإحنا عندنا 27 لعبة ومشاكل كبيرة".
واختتم حديثه: "لكن بيراميدز ساعد في إظهار إن الكرة مش هتفضل لحد واحد، وزي ما أنت قولت يا مهيب.. إنك مستني بيراميدز هيعمل إيه قدام الأهلي، وإن بطولة الدوري هيحددها بيراميدز".
